Inicio  |   Regístrate  |   Opinión  |   Anúnciese              
  

¿Qué eba el "palotiau" de Torres?

por Chaime Asensio

D'una de las tradizions més majas y més antiguas de Torres, la berdá e que no sabén casi ni de la misa la media; sabén qu'e un baile que mos llega de los Iberos, de los Ilergetes qu'eban la tribu íbera que "paixentaba" per estas tierras fa més de 2500 ans, tamé nay "estudiosos" que diuen que podría sé de los moros, pero e mol difizil que siga d'ixa manera perque la "bestimenta" que fan serbí los mozos cuan el bailan e mol parezida en to'l norte de España, desde Lleida asta Euzkadi y tan arriba ban está mol poco tiempo los moros perque treszientos ans no son res en historia.

Pa que tos faigaz una idea de coma eban los Danzes los qu'aigaz estau pa las Festas de Graus y aigaz bisto La'spera la Gaita, el Baile de las Espadas y la Llega, ya sabez molto de lo nuestro, perque, e mol normal, que dos llugás tan zerqueta tenisen tradizions parejas. Pos sí, eba cuasi, cuasi igual, la "Víspera" o Bispra, los mozos, acompañaus por el mosén s'en iban al Toral a'sperá que llegasen los Gaiters de Caserras, qu'eban los encargaus, no sólo de posá la música pa bailá los Danzes, sino que tamé eban la "orquesta" que tocaba cuan se feba de noche. Tamé tos diré, qu'estos Gaiters de Caserras o La Gaita de Caserras eban los encargaus de fe lo mesmo a Graus, Benabarre, Capella y a una zarpada més de llugás, per ixo, la música eba tamé casi la misma a toz ixos sitios, "La Hermosa Cardelina" se bailaba a Graus, Torres y Benabarre. El que estos misaches s'encargasen de llebá la música a toz ixos llugás ba sé el motibo de que no se tornasen a fe los Danzes en casi una zentena d'ans a Torres, qu'a Graus n'abese unas añadas que no ban fe Danzes, asta que ban aprendé a tocá la gaita mozos del llugá y qu'a Benbarre mos aigan següiu cuasi parejos con nusatros pero llebanmos unos beinte ans de bentaja.

Pero bueno, eban dixau a los mozos y al mosén esperán la gaita al Toral, d'asti s'en iban ta par de l'Iglesia, ane se zelebraban las Bispras y dispués, el mosén cobidaba a toz los mozos danzantes a dulzes, retafía (licor feito con anís) y anís. El día de Santiago, los mozos danzantes salleban en prozesión pel llugá, llebán al santo to cargau d'uga y bailaban "La Hermosa Cardelina" fen "mudanzas" con los tochos por los carrés asta que tornaban a l'Iglesia d'ane eban salliu, momento n'el que feban un arco con los tochos del danze (tamé podría sé que fuesen espadas, llebán los mozos un tocho n'una mano y una espada a l'atra) pa que pasasen las autoridades primero y toda la chen dispués. Cuan s'acababa la misa prenzipiaba la Pastorada a la Pllaza del Baile (no se feba al Trinquete perque ixa pllaza "sólo" tiene 120 ans y l'única pllaza gran que n'abeba a la bez eba la Pllaza del Bayle o Es porches - coma quieraz -) y cuan acaba, la Pastora (siempre han mandau molto las mullés al nuestro llugá) eba la que mandaba a los mozos danzantes empezá la danza y el Pastó (que representa la templlanza de la chen gran) les daba ánimos:

Fora miedo danzadós,
No olbidase de Santiago,
Alzaz coma yo la boz
Que dispués tos daré trago.
No ton ez de dá bergoña,
Fetos cuenta qu'estaz sólos:
¡Vivan Santiago y Santa Ana,
nuestros queridos Patronos!


Alabez, los zagals bailaban per este orden, "La Hermosa Cardelina", "Cuando el Rey", "Ea, mancebos" y pa sallé de la pllaza tornaban con "La Hermosa Cardelina".

El día de Santa Ana, dispués de que se n'abese feito la Morisma pel maitino, cuan s'acababa de comé tornaban los danzantes a sallé, ya por zaguera bez, fen la Pllega, lo qu'a Graus é la Llega (que debe de sé una deformazión de pllega que'n Castellano é "recogida"), sólo qu'a Torres, los danzantes bailaban pels carrés y mentras anaban pasán, atros mozos s'encargaban de llamá a todas las casas per ane pasaban pa que les ne dasen cosas con las que podé fe una zena a la Fon del Molino qu'eba la que marcaba el fin de las festas. Tamé eba obligau dales a los mozos una torta que teniba que sé igual a todas las casas, ¿Y perqué teniban que sé todas iguals? Per una cosa mol maja que se feba la Bispra antes de prenzipiá el baile, ara tos la conto: Denantes tamé n'abeba una comisión (per llamala d'alguna manera) que s'encargaba de organizá las festas y s'escojeba al Presidén d'ixa "comisión" que sería el "mandamás" per enzima de toz los atros mozos que tamé estaban a la "comisión", bueno, pos ixe zagal eba el Mayordomo o Mayoral de las festas y el día de la Bispra teniba el drecho d'amoltá, es dezir, podeba triá una mozeta pa bailá, que sería la Mayorala o reina de las festas (a Graus, Repatana lo que pasa que n'ay una por barrio que siempre les n'ha iu a los de Graus ixo d'anaye de llugá més gran) y fe el primer baile ellos solos a la pllaza; dispués la moza tendría que regalale al Mayoral una torta (de las de comé, no pensez mal) que se faría serbí de muestra pa la Pllega y que todas las casas del llugá farían igual. Eba una cosa mol maja, ¿No tos parix? Y con ixo ya s'acababan los danzes por aquel an asta la añada següen.

Dispués de contatos to esto, se me pasa pel tozuelo qu'a la chen ara, pa pasamoslo ben, pedín (exigín) una animalada de cosas que tendrían que pensá si mos fan falta, beyén que fa més de zien ans, cuan casi no teniban de nada, se correban unas juergas d'agárrate y no te menees.

   
Resolución óptima 800x600  © 2000-2004, www.ribagorza.com                   Aviso legal y protección de datos   |   Contactar  _ _